भोगावती महाविद्यालय, कुरुकली येथे दिनांक ५ ऑगस्ट २०२५ रोजी भव्य विद्यार्थी-पालक मेळाव्याचे आयोजन करण्यात आले. कार्यक्रमाचे प्रास्ताविक व स्वागत प्राचार्य डॉ. डी. ए. चौगले यांनी केले. त्यांनी महाविद्यालयाच्या शैक्षणिक, क्रीडा, सांस्कृतिक आणि सामाजिक उपक्रमांचा आढावा घेत विद्यार्थ्यांच्या प्रगतीसाठी पालकांच्या सहकार्याचे महत्त्व अधोरेखित केले.
कार्यक्रमाचे प्रमुख पाहुणे माननीय श्री. दिगंबर मेडशींगे, अध्यक्ष, शिक्षण प्रसारक मंडळ होते. प्रमुख उपस्थितीत माननीय श्री. बाजीराव चौगले, श्री. राजेंद्र आडके, उपप्राचार्य डॉ. एन. एम. पाटील, डॉ. डी. एल. कांबळे, सौ. एस. एस. आवळे मॅडम, डॉ. डी. के. दळवी, डॉ. एस. एन. साळोखे, प्रा. सुहास जाधव यांचा समावेश होता. कार्यक्रमाचे समन्वयक प्रा. पवन पाटील होते.
मेळाव्यात पालकांनी उत्साहाने सहभाग घेतला आणि रचनात्मक सूचना, अपेक्षा व समस्या मांडल्या.
- श्री. कृशांत गायकवाड, चाफोळी : ग्रामीण भागातील विद्यार्थ्यांना वेळेवर महाविद्यालयात पोहोचता यावे यासाठी एस.टी. वाहतुकीचे वेळापत्रक पुनर्रचित करण्याची गरज व्यक्त केली. विद्यार्थ्यांनी महाविद्यालयीन शिस्त पाळून परिसर स्वच्छ ठेवण्यावर भर दिला. तसेच, पालक-शिक्षक संवाद वाढवण्यासाठी तिमाही बैठकांचे आयोजन करावे, असे सुचविले.
- श्री. तानाजी पांडुरंग पाटील, कोदवडे : शिरगाव–रशीवडे मार्गावर एस.टी. सुविधा उपलब्ध करून देण्याची मागणी केली. विद्यार्थ्यांनी ठरवून दिलेल्या ड्रेस कोडचे पालन केल्यास शिस्त व एकरूपता वाढेल, असे मत व्यक्त केले. सर्व विद्यार्थ्यांना ओळखपत्र देऊन सुरक्षा व्यवस्था अधिक बळकट करावी आणि कॅम्पस प्रवेश नियंत्रित ठेवावा, अशी सूचना दिली.
- श्री. संभाजी पाटील, कौलव : जलतरण तलावाचा वेळ विद्यार्थी-संख्या लक्षात घेऊन वाढवावा, मुला-मुलींसाठी स्वतंत्र सत्रांची व्यवस्था करावी आणि प्रशिक्षित जलतरण प्रशिक्षकाची नियुक्ती करावी. या सुविधेमुळे विद्यार्थ्यांच्या शारीरिक तंदुरुस्तीला चालना मिळेल, असे त्यांनी नमूद केले.
- श्री. रवींद्र पाटील, अवळी खुर्द : मोबाईलचा गैरवापर टाळण्यासाठी महाविद्यालयाने स्पष्ट नियमावली तयार करावी, पालकांनी घरी देखरेख ठेवावी. विद्यार्थ्यांच्या जबाबदाऱ्या ओळखून त्यांनी अभ्यास, उपस्थिती आणि वर्तन सुधारावे. गुणवत्तावृद्धीसाठी महाविद्यालयाने आठवड्यातून एकदा मार्गदर्शन वर्ग घेण्याची सूचना केली.
या प्रसंगी डॉ. एस. एन. साळोखे यांनी विद्यार्थ्यांच्या सर्वांगीण विकासासाठी पालक, शिक्षक आणि विद्यार्थ्यांनी एकत्रित प्रयत्न करण्याचे महत्त्व सांगितले. त्यांनी पालकांचा सहकार्यभाव महाविद्यालयीन संस्कृती मजबूत करतो, असे सांगितले. डॉ. डी. एल. कांबळे यांनी महाविद्यालयातील ग्रंथालय, क्रीडा, आणि सांस्कृतिक सुविधा यांचा अधिकाधिक वापर करून विद्यार्थी बहुआयामी प्रगती साधू शकतात, असे सांगितले.
शेवटी माननीय श्री. दिगंबर मेडशींगे यांनी पालकांना संबोधित करत गेल्या सहा महिन्यांत झालेल्या कामांचा सविस्तर आढावा दिला. महाविद्यालय परिसरात सीसीटीव्ही कॅमेरे बसविणे, विद्यार्थ्यांसाठी ड्रेस कोड लागू करणे, सर्वांना ओळखपत्र देणे, कॅम्पस कंपाउंड मजबूत करणे यांसारखी कामे पूर्ण झाल्याचे सांगितले. पुढील काळात डिजिटल क्लासरूमची संख्या वाढविणे, ग्रंथालयातील ई-रिसोर्सेसचा विस्तार करणे, संगणक प्रयोगशाळा आधुनिकीकरण, क्रीडा सुविधा बळकट करणे, मुलींसाठी स्वतंत्र अभ्यासिका, तसेच परिसर सुशोभिकरण यासाठी नियोजन सुरू असल्याचे त्यांनी नमूद केले. पालकांचा अभिप्राय विकास आराखड्यात समाविष्ट करण्याचे आश्वासन देत “महाविद्यालयाचा विकास हा सर्वांचा सामूहिक प्रयत्न आहे” असे उद्गार काढले.
आभार प्रा. एन. एम. पाटील यांनी मानले. सूत्रसंचालन प्रा. पवन पाटील यांनी केले.
