भोगावती शिक्षण प्रसारक मंडळाच्या भोगावती महाविद्यालय आणि सिद्धम इनोव्हेशन अँड बिझनेस इनक्युबेशन सेंटर (SIBIC), कोल्हापूर यांच्यात शैक्षणिक देवाणघेवाण, कौशल्य विकास आणि रोजगाराच्या संधी उपलब्ध करून देण्यासाठी सामंजस्य करारावर (MoU) स्वाक्षरी करण्यात आली आहे. हा करार पुढील तीन वर्षांसाठी (२०२६ ते २०२९) लागू असणार आहे.
या करारामुळे कला (B.A.), वाणिज्य (B.Com.) व विज्ञान (B.Sc.) शाखेतील विद्यार्थ्यांना इंटर्नशिप, कौशल्य विकास आणि नाविन्यपूर्ण (Startup & Innovation) उपक्रमांची थेट संधी मिळणार आहे.
करारामधील प्रमुख उद्दिष्टे व वैशिष्ट्ये:
रोजगार व कौशल्य विकास: गरजवंत व पात्र विद्यार्थ्यांना रोजगाराच्या संधी देणे आणि भविष्यातील करिअर पर्यायांबद्दल मार्गदर्शन करणे.
स्टार्टअप व नाविन्यता प्रोत्साहन: संशोधन ते उत्पादन व्यापारीकरणाची संस्कृती रुजवणे आणि उद्योजकता विकास कार्यक्रमांचे आयोजन करणे.
शिक्षक व पायाभूत सुविधांची देवाणघेवाण: दोन्ही संस्थांमध्ये ग्रंथालय, डेटाबेस व इतर पायाभूत सुविधांचा परस्पर वापर करणे तसेच शिक्षकांची देवाणघेवाण करणे.
महिला सक्षमीकरण: क्षमता बांधणी कार्यक्रमांद्वारे महिला स्वयंसहाय्यता गटांना (Self-Help Groups) सक्षम करणे.
सरकारी योजनांची माहिती: कौशल्य विकास आणि नवकल्पनांसाठी असलेल्या शासकीय निधी व योजनांबद्दल जाणीव-जागृती निर्माण करणे.
संस्थांचे प्रमुख आणि उपस्थिती:
या करारावर भोगावती महाविद्यालयाचे प्राचार्य डॉ. एन. एम. पाटील आणि SIBIC चे मुख्य कार्यकारी अधिकारी (CEO) श्री. सूर्यकांत दोडमिसे यांनी अधिकृत स्वाक्षऱ्या केल्या. या सहकार्याची योग्य अंमलबजावणी करण्यासाठी एका ‘कार्यक्रम देखरेख समितीची’ (Programme Monitoring Group) स्थापना करण्यात आली आहे, ज्याचे अध्यक्ष प्राचार्य डॉ. एन. एम. पाटील असणार आहेत. या समितीत डॉ. सुनील एस. चौगुले (को-ऑर्डिनेटर), प्रो.(डॉ.) डी. के. दळवी, प्रो.(डॉ.) टी. एम. चौगुले, प्रो. आर. एस. भोसले, श्री. अजित कांबळे तसेच SIBIC कडून श्री. प्रतीक ओसवाल, श्री. सूर्यकांत दोडमिसे आणि श्रीमती सुनंदा एस. दोडमिसे यांचा समावेश आहे.
“ग्रामीण आणि दुर्गम भागातील विद्यार्थ्यांना केवळ पुस्तकी ज्ञान न देता त्यांना उद्योगधंद्यांच्या गरजेनुसार कुशल बनवणे आणि रोजगाराच्या संधी उपलब्ध करून देणे हा या कराराचा मुख्य उद्देश आहे.”— प्राचार्य डॉ. एन. एम. पाटील, भोगावती महाविद्यालय.
